ઈરાનના રાષ્ટ્રપતિ, વિદેશ મંત્રીનું હેલિકોપ્ટર દુર્ઘટનામાં મોત

ઈરાનના રાષ્ટ્રપતિ ઈબ્રાહિમ રઈસીનું હેલિકોપ્ટર દુર્ઘટનામાં નિધન થયું છે. તેઓ 63 વર્ષના હતા. ઈરાનની સરકારી ન્યૂઝ એજન્સી IRNAએ સોમવારે સવારે આ જાણકારી આપી. અઝરબૈજાનથી પરત ફરતી વખતે રવિવારે સાંજે 7 વાગ્યાની આસપાસ તેમનું હેલિકોપ્ટર ગુમ થયું હતું. રઈસી અને વિદેશ મંત્રી હોસૈન અમીરાબદુલ્લાહિયન સહિત 9 લોકો વિમાનમાં સવાર હતા. અકસ્માતમાં દરેકનાં મોત થયાં હતાં.હેલિકોપ્ટર અઝરબૈજાનની સરહદ નજીક ઈરાનના વરજેધન શહેર પાસે ક્રેશ થયું હતું. આ ડુંગરાળ વિસ્તાર છે. ભારે વરસાદ, ધુમ્મસ અને કડકડતી ઠંડી વચ્ચે બચાવ એજન્સીઓએ આખી રાત ત્યાં સર્ચ ઓપરેશન હાથ ધર્યું હતું. આ દરમિયાન ત્રણ બચાવકર્મી પણ ગુમ થયા હતા. સોમવારે સવારે 17 કલાક બાદ અઝરબૈજાનની પહાડીઓમાં હેલિકોપ્ટરનો કાટમાળ જોવા મળ્યો હતો.