પરીક્ષા આપ્યા વગર વિદેશથી ડોક્ટર બન્યા CBI એ 73 વિરૂદ્ધ કેસ દાખલ કર્યા

સેન્ટ્રલ બ્યુરો ઑફ ઇન્વેસ્ટિગેશન (CBI) એ ફરજિયાત પરીક્ષા (FMGE) પાસ કર્યા વિના વિદેશી દેશોના મેડિકલ ગ્રેજ્યુએટ્સને ભારતમાં દવાની પ્રેક્ટિસ કરવાની મંજૂરી આપવા બદલ કેસ નોંધ્યો છે. એજન્સીએ રાજ્યની 14 મેડિકલ કાઉન્સિલ અને 73 વિદેશી મેડિકલ ગ્રેજ્યુએટ્સ સામે તપાસ શરૂ કરી છે.

ભારતમાં પ્રેક્ટિસ કરવા માટે નેશનલ મેડિકલ કમિશન અથવા સ્ટેટ મેડિકલ કાઉન્સિલ સાથે કામચલાઉ અથવા કાયમી નોંધણી મેળવવા માટે વિદેશમાંથી મેડિકલ ગ્રેજ્યુએટને નેશનલ બોર્ડ ઑફ એક્ઝામિનેશનની FMGE/સ્ક્રિનિંગ ટેસ્ટ ફરજિયાતપણે લાયક ઠરે છે. અધિકારીઓએ જણાવ્યું હતું કે, સીબીઆઈએ રાજ્યની મેડિકલ કાઉન્સિલ અને મેડિકલ કાઉન્સિલ ઑફ ઈન્ડિયાના 73 વિદેશી મેડિકલ ગ્રેજ્યુએટ્સ સાથે અજ્ઞાત અધિકારીઓ વિરુદ્ધ બનાવટી, છેતરપિંડી, ગુનાહિત કાવતરું અને ભ્રષ્ટાચારના કેસ નોંધ્યા છે.

નેશનલ બોર્ડ ઓફ એક્ઝામિનેશને આરોગ્ય મંત્રાલયને જાણ કરી હતી કે 2011-22 દરમિયાન રશિયા, યુક્રેન, ચીન અને નાઈજીરિયા જેવા દેશોમાંથી MBBS કરી રહેલા 73 મેડિકલ ગ્રેજ્યુએટ્સે ભારતમાં FMGE પરીક્ષા પાસ કરી ન હતી. આમ છતાં તેણે વિવિધ સ્ટેટ મેડિકલ કાઉન્સિલમાંથી રજીસ્ટ્રેશન મેળવ્યું છે. આવા બિન-લાયકાત ધરાવતા વ્યક્તિઓની આ પ્રકારની છેતરપિંડી અને બોગસ નોંધણી નાગરિકોના આરોગ્ય અને કલ્યાણ માટે હાનિકારક છે.