‘મેચ થવા દો, અમે રોક નહીં લગાવીએ’: ભારત-પાકિસ્તાન ટી20 મેચ રદ કરવાની અરજી સુપ્રીમ કોર્ટે ફગાવી
નવી દિલ્હી :
સુપ્રીમ કોર્ટે ભારત અને પાકિસ્તાન વચ્ચે આવતી 14 સપ્ટેમ્બરે દુબઈમાં યોજાનારી એશિયા કપની ટી20 મેચ રદ કરવા માટે દાખલ કરવામાં આવેલી અરજીને ફગાવી દીધી છે. કોર્ટે સ્પષ્ટ શબ્દોમાં કહ્યું કે – “મેચ થવા દો, અમે તેને રોકીશું નહીં.”
એલએલબીના ચાર વિદ્યાર્થીઓએ પહલગામ આતંકી હુમલો સહિતના અન્ય હુમલાઓનો ઉલ્લેખ કરતાં પાકિસ્તાન સાથે ક્રિકેટ સંબંધો તોડી નાખવા અને આવનારી મેચ પર પ્રતિબંધ મૂકવાની માગણી સાથે અરજી દાખલ કરી હતી.
અરજીની સુનાવણીનો ઇનકાર
આ અરજી પર સુનાવણી કરવા માટે વિદ્યાર્થીઓએ વિનંતી કરી હતી કે મામલાને તાત્કાલિક શુક્રવારે લિસ્ટ કરવામાં આવે, કારણ કે રવિવારે મેચ યોજાવાની છે. પરંતુ સુપ્રીમ કોર્ટની જસ્ટિસ જે. કે. મહેશ્વરી અને જસ્ટિસ વિજય બિશ્નોઈની બેન્ચે સ્પષ્ટ કરી દીધું કે કોર્ટ કોઈ રોક લગાવશે નહીં.
વકીલ દ્વારા ફરીથી વિનંતી કરવામાં આવી હોવા છતાં, કોર્ટે સ્પષ્ટ કર્યું કે આ મામલે તાત્કાલિક સુનાવણી કરવાની જરૂર નથી.
ક્રિકેટ અને રાજકારણ અલગ: કોર્ટનો સંદેશ
સુપ્રીમ કોર્ટના આ નિવેદન પછી સ્પષ્ટ સંદેશ જાય છે કે ક્રીડા ક્ષેત્રની બાબતોને લઈને ન્યાયાલય સીધી દખલઅંદાજી નહીં કરે. સુરક્ષા અને રાજદ્વારી નીતિ સંબંધિત નિર્ણયો સરકાર અને સંબંધિત એજન્સીઓ પર છોડી દેવામાં આવ્યા છે.
મેચ અંગે આતુરતા
હવે ક્રિકેટ ચાહકોમાં ભારત-પાકિસ્તાન વચ્ચેની હાઈ વોલ્ટેજ મુકાબલો જોવા માટે આતુરતા વધી ગઈ છે. બંને દેશો વચ્ચેનો દરેક મુકાબલો પરંપરાગત સ્પર્ધા અને દેશભક્તિની ભાવનાઓને ઉગ્ર બનાવે છે.
