સુરતમાં દેશની સૌથી મોટી હીરા ચોરી

કાપોદ્રા વિસ્તારમાં આવેલી ડી.કે. એન્ડ સન્સ ડાયમંડ કંપનીમાં દેશની અત્યાર સુધીની સૌથી મોટી હીરા ચોરીનો કેસ સામે આવ્યો છે. ત્રણ દિવસની જાહેર રજાનો લાભ ઉઠાવીને ચોરોએ આ સુનિયોજિત ચોરીને અંજામ આપ્યો હતો. ચોરોએ ચોથા માળે આવેલી ફેક્ટરીને ટાર્ગેટ કરી હતી. અંદર પ્રવેશવા માટે દરવાજા તોડી નાખ્યા અને કાચ કાઢીને ઓફિસમાં પ્રવેશ કર્યો. બાદમાં ગેસ કટર વડે ત્રણ લેયરની તિજોરીમાં 12 ઇંચ બાય 10 ઇંચનું છીદ્ર પાડી અંદરના હીરા અને રોકડ ઉઠાવી ગયા હતા. તિજોરી તોડવાની પ્રક્રિયા માટે તેમને અંદાજે દોઢથી બે કલાક લાગ્યા હોવાનું માનવામાં આવે છે. સૌથી પહેલા ચોરોએ બહારનો ફાયર એલાર્મ તોડી નાખ્યું, જેથી કટિંગ દરમિયાન કોઈ અવાજ કે ધુમાડાથી એલાર્મ ન વાગે. ચોરી બાદ ચોરોએ CCTV કેમેરા તોડી નાખ્યા અને DVR પણ લઈ ગયા, જેથી તેમના હાવભાવ કે ઓળખ અંગે કોઈ પુરાવા ન રહી શકે. આ સમગ્ર બિલ્ડિંગમાં છેલ્લા ત્રણ દિવસથી સિક્યુરિટી ગાર્ડ હાજર નહોતો, કારણ કે રજાઓને કારણે તેને રજા આપવામાં આવી હતી. આ અવસરનો ચોરોએ ચોક્કસ ઉપયોગ કર્યો. પોલીસના જણાવ્યા મુજબ, ચોરીની રીત જોતા લાગે છે કે આ કોઈ સામાન્ય ચોરી નથી, પરંતુ એક સુનિયોજિત કાવતરું છે.પોલીસના પ્રાથમિક અંદાજ મુજબ, અંદાજે ₹25 કરોડથી વધુ મૂલ્યના હીરા ચોરાઈ ગયા છે. ઘટનાસ્થળે DCP, ACP અને FSL ટીમ પહોંચી તપાસ શરૂ કરી છે. નજીકના વિસ્તારના CCTV ફૂટેજ ચકાસવામાં આવી રહ્યા છે, જેથી ચોરોના સંકેત મળી શકે.ઘટનાસ્થળની નજીક મેઇન રોડથી ફેક્ટરી પહોંચવા માટે અંદાજે 200 મીટરનો રસ્તો છે, જેમાં વચ્ચે 50 જેટલી દુકાનો અને અન્ય ડાયમંડ ફેક્ટરીઓ આવેલી છે. તેથી પોલીસ માનતી છે કે આ ફેક્ટરી વિશે ચોરોને અગાઉથી જ સંપૂર્ણ જાણકારી હતી. આ કારણે અંદરની જાણકારી આપનાર (ઇનસાઇડર) પણ સંડોવાયેલ હોઈ શકે છે તેવી દિશામાં તપાસ ચાલી રહી છે.