અમદાવાદ-મુંબઈ ‘તેજસ’ને મુખ્યમંત્રી રૂપાણીની લીલીઝંડી 
1579282679645-1727.JPG
January 18,2020 12

અમદાવાદ-મુંબઈ ‘તેજસ’ને મુખ્યમંત્રી રૂપાણીની લીલીઝંડી

ગાંધીનગર : દેશની બીજી ખાનગી ટ્રેન, અમદાવાદ-મુંબઇ તેજસ એકસપ્રેસને મુખ્યમંત્રી વિજય રૂપાણીએ અમદાવાદથી પ્રસ્થાન કરાવી હતી. આ ટ્રેન, અમદાવાદથી ૬.૧૫થી ૭.૧૫ કલાકમાં મુંબઈ પહોંચાડશે. આ તબક્કે તેમણે કહ્યું હતું કે, આ ટ્રેન શરૂ થતાં વડોદરા ભરૂચ સુરત અને વાપી જેવા વ્યાપારિક કેન્દ્રોના યાત્રીઓને એક વધુ વિકલ્પ મળ્યો છે. વિશેષ રૂપે વ્યાપારી વર્ગના યાત્રાળુઓને ખૂબ સારી સુવિધા મળતી થવાની છે. જે પ્રકારની સુવિધાઓ વિમાનમાં અથવા વિકસિત દેશોની ટ્રેનોમાં ઉપલબ્ધ હોય છે એવા જ પ્રકારે આધુનિક સુવિધાઓનો લાભ ગુજરાતના લોકોને તેજસ એક્સપ્રેસના માધ્યમથી મળશે.
મુખ્યમંત્રીએ કહ્યું હતું કે, ગુજરાતમાં 2014થી અત્યાર સુધી કુલ 118 ટ્રેન શરૂ થઈ છે. આમાં ગુજરાતમાંથી શરૂ થનાર અને ગુજરાતમાંથી આગળ વધનાર ટ્રેનોનો પણ સમાવેશ કરવામાં આવ્યો છે. વડાપ્રધાનના સંકલ્પને કારણે એક જ વર્ષમાં ૨૪૫ કિલોમીટરના ગેઝ કન્વર્ઝન, ન્યુ લાઈન તથા ડબલિંગના કર્યો શરૂ થયા છે. કુલ મળીને એપ્રિલ 2014થી અત્યાર સુધી ગુજરાતમાં 2,161 કિલોમીટરની નવી લાઈનના પ્રોજેક્ટ, ગેઝ પરિવર્તનના પ્રોજેક્ટ તથા ડબલિંગ અને થર્ડ પ્રોજેક્ટ કાર્યો શરૂ કરાયા છે.
તેજસ એક્સપ્રેસ સપ્તાહમાં 6 દિવસ દોડશે . આ ટ્રેન, સપ્તાહમાં ગુરુવાર સિવાયના બાકીના 6 દિવસ દોડશે. દર ગુરુવારે ટ્રેનનું મેન્ટેનન્સ કરાશે. એક્ઝિક્યૂટિવ કોચની તમામ 56 સીટો પર એલઈડી સ્ક્રીન મૂકાઈ છે. આ સાથે ઓટો સેન્સર ડસ્ટબિન, સીસીટીવી, ફાયર સેફ્ટીની સુવિધા છે. ટ્રેનમાં વૃદ્ધો કે બાળકોને ઠંડી લાગે તો તેમને ચાદર પણ અપાશે. ઓનબોર્ડ શોપિંગની પણ સુવિધા મળશે.
તેજસમાં કુલ 736 પેસેન્જરો મુસાફરી કરી શકશે. તેજસ એક્સપ્રેસમાં કુલ 10 કોચ રહેશે. ટ્રેનમાં 56 સીટની ક્ષમતાવાળા બે એક્ઝિક્યુટિવ ચેર કાર કોચ મળી કુલ 112 સીટ તેમજ 78 સીટની ક્ષમતા ધરાવતા 8 ચેર કાર કોચ એટલે કે કુલ 624 સીટ મળી કુલ 736 પેસેન્જરો મુસાફરી કરી શકશે. ટ્રેનમાં હોસ્ટેસના યુનિફોર્મ લખનઉ અને નવી દિલ્હી તેજસની હોસ્ટેસ કરતા અલગ હશે. તેમના યુનિફોર્મમાં ગુજરાતી પહેરવેશની ઝલક જોવા મળશે.
તેજસ એક્સપ્રેસ ટ્રેન ક્યારે ઉપડશે ? તેજસ અમદાવાદથી સવારે 6.40 વાગ્યે સવારે ઉપડશે અને મુંબઈ સેન્ટ્રલ 1.55 વાગ્યે બપોરે પહોંચશે. જ્યારે મુંબઈ સેન્ટ્રલથી 3.40 વાગ્યે બપોરે ઉપડશે અને અમદાવાદમાં રાત્રે 9.55 વાગ્યે પહોંચશે. અંદાજિત 6 કલાકમાં તેજસ એક્સપ્રેસ મુંબઈથી અમદાવાદ પહોંચશે. આ ટ્રેનની સ્પીડ પ્રતિ કલાક 160 કિ.મી.ની રહેશે.

Top